Tina Salama, ku ifoto
Nyuma ya Kigali Emir wa Qatar yakiriwe i Kinshasa, ni iki cyaba kimugenza?
Nyuma y’uruzinduko mu Rwanda ku wa kane aho yagiranye ikiganiro bwite na Perezida Paul Kagame umutegetsi mukuru wa Qatar yakiriwe n’i Kinshasa kuri uyu wa gatanu aho yakiriwe kandi akaganira na Perezida Félix Tshisekedi wa Repubulika ya Demokarasi ya Congo.
Cheikh Tamim Ben Hamad Al Thani ni we Emir (umutegetsi mukuru wagereranywa na perezida muri za repubulika) wa mbere wa Qatar usuye DR Congo, nk’uko bivugwa na Tina Salama umuvugizi wa perezida wa Congo.
Al Thani asuye ibi bihugu byombi mu gihe Qatar yashyize umuhate mu biganiro bigamije kugera ku masezerano y’amahoro hagati leta ya Kinshasa n’umutwe wa M23, ibisa n’ibyananiranye kugeza ubu.
Tina Salama yatangaje ku rubuga X ko uru ruzinduko rwa Al Thani muri DRC rujyanye no gukomeza umubano w’ibi bihugu “by’inshuti” mu by’ubukungu.
Ibinyamakuru muri Qatar bivuga ko Emir w’iki gihugu yagiye mu Rwanda gukomeza umubano ibihugu byombi bifitanye ushingiye ku bufatanye mu by’ubukungu.
Ibiro bya perezida w’u Rwanda bivuga ko Perezida Kagame yahaye inka Emir Al Thani ubwo yamwakiriraga mu rwuri rwe ruri i Kibugabuga mu karere ka Bugesera, nk’ “ikimenyetso cy’ubucuti, kubahana, n’umubano ukomeye” wabo bombi n’ibihugu byabo.
Ifoto yo mu rwuri rwa Perezida Kagame
Qatar ifite ishoramari rikomeye mu kibuga cy’indege gishya kirimo kubakwa mu Bugesera mu Rwanda ndetse no muri Rwandair, kompanyi ya leta y’ubwikorezi mu by’indege.
Qatar kandi yatangiye ishoramari mu bijyanye n’ubwikorezi mu mazi muri DR Congo, ndetse kompanyi Al Mansour Holding yo muri Qatar iherutse kumvikana na leta Kinshasa ku gushora imari ya miliyari 21$ muri Congo mu nzego 15 zirimo ubucukuzi bw’amabuye y’agaciro, uburobyi, ubuvuzi, imari n’abanki, n’izindi.
By’umwihariko ariko Qatar ihanzweho amaso mu kugerageza kurangiza intambara mu burasirazuba bwa Congo hagati y’umutwe wa M23 na leta.
Perezida Tshisekedi, ashinja mugenzi we Paul Kagame ko leta ye yohereza ingabo muri Congo gufasha umutwe wa M23, leta y’u Rwanda na yo igashinja iya DR Congo ko igisirikare cyayo gikorana n’umutwe wa FDLR urwanya ubutegetsi bw’u Rwanda.
Ku ntangiriro y’umuhate wa Qatar, ubwo intambara yari ikaze, mu buryo butunguranye muri Werurwe (3) uyu mwaka Tshisekedi na Kagame bagaragaye i Doha, Hamad Al Thani abicaye hagati.
Muri Werurwe uyu mwaka, mu buryo bwatunguranye, Kagame na Tshisekedi bagaragaye bahujwe na Emir Tamim bin Hamad Al Thani i Doha
Mu gihe Tshisekedi yari yaraciye “umurongo utukura” ko leta ye itazigera iganira na M23, igitutu cy’ibihugu birimo Qatar na Amerika byatumye ibiganiro bya Doha bitangira, ndetse mu kwezi kwakurikiyeho kwa Mata(4) impande zombi zemeranyije kuba zihagaritse imirwano, “nyuma y’ibiganiro byo kubwizanya ukuri kandi byubaka”.
Mu gihe intego nyamukuru ari ukugera ku masezerano y’amahoro amezi ashize arenga umunani bitaragerwaho, buri ruhande rushinja urundi ubushake bucye, buri ruhande kandi rushinja urundi gutangiza ibitero bituma intambara zikomeza hirya no hino mu bice by’intara za Kivu y’Epfo na Kivu ya Ruguru.
