Léon Habyarimana ni umwemu bahungu b’uwahoze ari Perezida w’u Rwanda Juvénal Habyarimana,

Léon Habyarimana

Umuhungu w’uwahoze ari Perezida w’u Rwanda Juvénal Habyarimana yabwiye itangazamakuru ko “nta kibazo kirimo” habaye hari uwo muryango wabo wavuganye na Perezida wa Repubulika ya Demokarasi ya Congo, nyuma yuko Perezida w’u Rwanda Paul Kagame, ashinje uwo muryango kuba mu mugambi wo kugirira nabi ubutegetsi.

Mu kiganiro n’abanyamakuru ku wa kane, atamuvuze mu izina, Perezida Kagame yashinje “umwe mu bahungu ba Habyarimana” n’abantu barimo n’abahoze ari abategetsi muri leta y’u Rwanda iriho ubu, kuba mu mugambi bahuriyeho n’umutwe wa FDLR urwanya ubutegetsi bw’u Rwanda, ukorera mu burasirazuba bwa DRC.

Mu kiganiro kuri telefone nabanyamakuru, Léon Habyarimana – umwe mu bahungu b’uwahoze ari Perezida Habyarimana– ntiyahakanye cyangwa ngo yemeze ko hari uwo muryango wabo wavuganye na Perezida wa DRC Félix Tshisekedi, yongeraho ko ari ku bwo “gushakira ubumwe Abanyarwanda”.

Léon Habyarimana ntiyavuze ko mu bo umuryango wabo wavuganye na bo harimo na FDLR.

Yagize ati: “Tuvugana n’abantu benshi, twavugana na Perezida Tshisekedi [cyangwa] tutavugana na we, ndumva ibyo nta kibazo kirimo, nta nubwo ari ibintu umuntu yakwirirwa anatindaho.”

Abajijwe kubisobanura neza, yagize ati: “Ikintu jyewe nakwemeza, ni uko abantu abo ari bo bose tuvugana ku byerekeye u Rwanda, tuvugana na bo turi gushakira ubumwe Abanyarwanda, turi gushakira amahoro Abanyarwanda bose kandi turi gushakira ubutabera Abanyarwanda bose.”

Muri icyo kiganiro n’abanyamakuru, Perezida Kagame yavuze ku muryango wa Habyarimana ubwo yasubizaga ikibazo cy’umunyamakuru w’ikinyamakuru La Croix cyo mu Bufaransa.

Uwo munyamakuru yabajije Kagame icyo atekereza ku kuba dosiye iregwamo Agatha Kanziga, umupfakazi w’uwari Perezida Habyarimana, bishoboka cyane ko iteshwa agaciro mu nkiko zo mu Bufaransa, “n’isano cyangwa ijambo” uwo muryango, nkuko uwo munyamakuru wa La Croix yabivuze, ushobora kuba ugifite “kuri FDLR binyuze muri Kinshasa”.

Perezida Kagame mu kiganiro n’abanyamakuru mu biro bye Village Urugwiro, i Kigali, ku wa kane

Kagame yavuze ko bifitanye isano harimo no “kugabanya isura mbi nyayo ya FDLR”.

Yagize ati: “Mu gihe cya vuba aha gishize, mu myaka, mu mezi [ashize], turabizi ko umuhungu, umwe mu bahungu ba Habyarimana hamwe na bamwe mu bantu bahunze bavuye hano, hagati aho, baba i Burayi, muri Amerika, bakora muri uyu mugambi wa FDLR, ndetse bashatswe, bahabwa amafaranga, [ndetse] bakomeje gushinga ibintu binyuranye bayobowe na Perezida wa DRC, we ubwe

Turakurikira, tubona inzinduko, inzinduko nyinshi bagirira muri leta ya DRC i Kinshasa ndetse dukurikira ibikorwa bashobozwa kujyamo. Barimo n’abahoze ari abategetsi muri leta [y’u Rwanda] bahunze nko mu myaka 20 ishize…”

“Rero ibi bintu ushobora kubihuza. Ubona FDLR ihishirwa n’abategetsi bamwe b’i Burayi n’ahandi, nuko [ukabona] umuryango wa Habyarimana, abantu bagize uruhare mu byabaye by’amahano nk’umugore we, bari mu nkiko, dosiye igafatwa uko ibyo bihugu bikomeye bibigennye.”

Ubucamanza bw’u Rwanda bushinja Agatha Kanziga ko we n’abari bakomeye mu gisirikare na politike bari bari hafi y’umuryango wa Perezida Habyarimana mu cyiswe ‘Akazu’, ari bo bari inyuma y’umugambi wa jenoside yabaye mu Rwanda mu 1994. Agatha Kanziga yakomeje kubihakana.

Uyu ni umuhungu wu wari Perezida mu Rwanda, Juvenal Habyarimana

Muri Gicurasi (5) uyu mwaka, abacamanza bo mu Bufaransa bafashe umwanzuro – nyuma wajuririwe n’uruhande rumushinja – wo gushyira iherezo ku maperereza

kuri Kanziga, w’imyaka 82, bavuga ko “agaragara atari nk’uwakoze jenoside, ahubwo neza nk’uwahohotewe kubera igikorwa cy’iterabwoba” cyakorewe umugabo we, ubwo indege yari arimo yahanurwaga yitegura kugwa ku kibuga mpuzamahanga cy’indege cya Kigali, mu ijoro ryo ku wa gatatu, ku itariki ya 6 Mata (4) mu 1994.