Impunzi z’Abanyecongo zirimo kwitegura gusubira i Goma kuri uyu wa kane ziva mu nkambi ya Rugerero mu nkengero z’umujyi wa Rubavu
Impunzi zibarirwa mu magana zavuye mu mujyi wa Goma zihunga imirwano mu ntangiriro z’iki cyumweru ubu zirimo gusubira iwabo.
Benshi muri izi mpunzi ni abari bashyizwe mu nkambi y’agateganyo ya Rugerero iri mu nkengero z’umujyi wa Rubavu mu majyaruguru ashyira uburengerazuba bw’u Rwanda.
Aba biganjemo abaturage bo mu kiciro giciriritse batari bafite ubushobozi bwo kwikodesheraza inzu mu mujyi wa Rubavu cyangwa imiryango bwite ibakira.
Abategetsi bavuga ko abarenga 600 batashye ejo hashize ku wa gatatu.
Abategetsi ba DR Congo hamwe n’Ishami rya ONU ryita ku mpunzi bavuga ko abantu barenga 500,000 bavuye mu byabo muri uku kwezi kwa Mutarama 2025 kubera imirwano mu burasirazuba bwa DR Congo.
Ku nkambi y’agateganyo ya Rugerero aho nageze muri iki gitondo kugeza saa yine z’amanywa hari hamaze kwiyandikisha hafi 200 bashaka gusubira iwabo.
Nzabayo Musagara umwe muri izi mpunzi yambwiye ati: “Nahisemo kugenda kuko numvise ko amahoro yatangiye kugaruka…nta bwoba mfite bwo gutaha, nta kibazo.”
Umuryango Save The Children uvuga ko abana barenga 50,000 bahunze imirwano mu burasirazuba bwa DRC muri uku kwezi kwa Mutarama 2025
Beata Nikuze na we ahisemo kuva muri iyi nkambi ngo ajye mu muryango afite mu mujyi wa Rubavu mu Rwanda kubera ko inzu ye muri DR Congo yatwitswe.
Ndi umwanditsi ahangaha kuri uru rubuga, ibindi mu zambaze.