Patrick Muyaya mu kiganiro n’abanyamakuru ku wa kane i Kinshasa yavuze ko umutwe wa AFC/M23 ari wo urenga ku masezerano y’agahenge

Guhera ubu igitero [cyabo] kizajya gisubizwa ikindi” – AFC/M23

Uruhande rwa leta ya Kinshasa n’urwa AFC/M23 bongeye gushinjanya kurenga ku masezerano yo kubahiriza agahenge nyuma y’imirwano ikomeye yavuzwe muri iki cyumweru mu ntara za Kivu ya Ruguru na Kivu y’Epfo.

Mu kiganiro n’abanyamakuru ku wa kane i Goma, abakuriye M23 bavuze ko “Kinshasa idashaka amahoro” kandi ko guhera ubu “tuzajya dusubirisha igitero cyose [cyabo] ikindi”.

Patrick Muyaya, umuvigizi wa leta ya Kinshasa na we ku wa kane, ashinja M23, yabwiye abanyamakuru ati: “Tuzi urenga ku gahenge, kandi tuzi urimo kwica abantu i Goma na Bukavu”.

Ku wa kabiri no ku wa gatatu imirwano hagati y’imitwe ya Wazalendo na M23 mu duce twa Masisi na Walikale muri Kivu ya Ruguru yatumye abantu benshi bava mu byabo barahunga, nk’uko ibinyamakuru muri DR Congo bibivuga.

Imirwano yongeye kubura mu gihe mu minsi ishize mu biganiro i Doha muri Qatar intumwa za M23 na Kinshasa zumvikanye gushyiraho urwego rwo kugenzura iyubahirizwa ry’agahenge, kumvikanyweho muri Nyakanga (7) uyu mwaka ariko katigeze kubahirizwa neza.

Bertrand Bisimwa na Corneille Nangaa mu kiganiro n’abanyamakuru ku wa kane i Goma mu burasirazuba bwa DR Congo

Ku wa kane, Corneilla Nangaa ukuriye ishami rya politike rya AFC/M23 yabwiye abanyamakuru i Goma ko Kinshasa n’abafatanya na yo “bafunze amayira yose” mu gace ka Minembwe bagateza “inzara yiyongeraho ibitero ku baturage b’abasivile”.

Nangaa ashinja Kinshasa kurenga ku masezerano atandukanye yemerewe i Doha. Ati: “Byerekana ko ubutegetsi bwa Kinshasa bukomeje intego yabwo yo kwihambira ku gisubizo kimwe cya gisirikare kuri aya makimbirane