Abantu nibura 50 barishwe n’abitwaje ibirwanisho mu ntara ya Ituri iri mu buseruko bwa Repubulika ya Demokarasi ya Congo, nk’uko vyemezwa n’abategetsi b’akarere.
Ku wa kabiri Jean Vianney umukuru wa segiteri ya Djaiba yavuze ko inyeshamba z’umurwi CODECO ni zo zakoze iki gitero ku wa mbere, aho baturiye amazu yuzuye abantu, bongera batera bakoresheje inkoho n’imipanga, barasahura, bafata ku nguvu abagore n’abakowa.
“Hari abantu bakomeretse, abandi benshi bahira mu mazu gushika barapfa”, niko Vianney abivuga, agasigura ko abamaze kumenyekana ko bapfuye ari 51, ariko ko igitigiri gishobora kwiyongera.
Floribert Byaruhanga, umunyamategeko wa teritware ya Djugu, na we nyene atanga igitigiri gihakwa kungana n’ico, 52, akavuga ko harimwo n’abana 18.
Umuvugizi w’igisirikare muri iyo ntara, Jules Ngongo, avuga ko abasirikare bagerageje gutabara ariko ko bahashitse akaba kabaye, ataco bagikiza.
Yabwiye itororokanirizo Reuters kuri terefone ati: “Ivyabaye kuri segiteri ya Djaiba birateye agahinda uravye abanyagihugu bacu bapfuye, kandi turavyiyamirije twivuye inyuma”.
Igitero kw’ikambi y’abateshejwe izabo carateshejwe
Mw’ijoro ry’imbere y’aha, inyeshamba kandi zari zakoze igitero kw’ikambi y’abateshejwe izabo imbere y’uko zisubizwa inyuma n’ingabo za ONU zijejwe kubungabunga amahoro, MONUSCO, zikorera mu karere.
CODECO ni umwe mu buhojojo bw’imirwi yitwaje ibirwanisho irwanira ubutaka n’amatungo kama mu buseruko bwa Repubulika ya Demokarasi ya Congo, ikaba ikunze kwizizira amakambi y’abateshejwe izabo.
CODECO ni umurwi w’abitwaje ibirwanisho bo mu bwoko bw’Aba-Lendu, muri kahise bakaba bagiye bagirizwa ibitero vy’ubugome, ku banyagihugu bo mu bwoko bw’Aba-Hema muri iyo ntara ya Ituri.
Mw’itangazo, umuvugizi w’ingabo za ONU zijejwe kubungabunga amahoro Jean-Tobie Okala avuga ko izi ngabo zijejwe kubungabunga amahoro zashoboye gukingira aba banyagihugu bateshejwe izabo bari muri iyo kambi.
Okala yongerako ati: “Ariko bararengerwa, cane cane iyo inyeshamba ziteye ari nyinshi cane, nk’uko vyagenze mw’ijoro ryakeye [igihe zatera ibigwati vyegereye aka karere]”.
Intambara nyinshi zihanze Congo, cane cane mu ntara za Kivu hafi ya Ituri
Ituri, intara iri hirya cane mu buseruko bwa Congo, iri ku birometero biharurwa mu bihumbi uvuye ku mugwa mukuru Kinshasa.
bakunzi mwese mukunda uru rubuga ndabasuhuje cyane, ahangaha nzajya mbasangiza amakuru adasanzwe nawe uhawe ikaze ku kwa ndika